Tveir komnir. Aðeins 4 eftir.

Jæja þá eru mínir menn búnir að vinna tvo titla þetta tímabilið. En þeir hafa unnið vodacom bikarinn á mótinu í S-Afríku og Samfélagsskjöldin. Núna eru bara deildin, deildarbikar, FA bikarinn og Meistaradeildin eftir.

 

Það var rosalega gaman að sjá Gary Neville mættan aftur en það er samt augljóst að hann á töluvert í land með að ná fyrri getur. Var sérstaklega ryðgaður í sendingunum í fyrri hálfleik.

Tevez var magnaður og út um allan völl.

Fletcher var bara spilandi samba bolta og spurning hvort að Anderson hefur verið að skóla hann eitthvað til í bolta meðferðinni.

Fraizier Campbell kom inn á og var óheppinn að skora ekki þrátt fyrir frábæra takta og alveg greinilegt að hann getur orðið okkur góður leikmaður í framtíðinni.

O'Shea van alveg frábæra varnarvinnu inn á miðjunni.

En að lokum maður leiksins Ryan Giggs. Var alveg unun að horfa á hann í dag og greinilegt að hann er ekki búinn á því eins og margir vilja meina.

Eins og ég sagði einn titill kominn í hús og vonandi koma 4 í viðbót áður en tímabilið verður búið.

 

Glory glory Man Utd! 

United vann Samfélagsskjöldinn

Athugasemdir

[Pinky and the Brain, 10.8.2008 kl. 17:44]

Það hefur oftar en ekki verið ígildi Reykjavíkurmótsins að taka samfélagsskjöldin. Fátt um fína drætti í deildinni það árið ...

[Pétur Orri Gíslason, 10.8.2008 kl. 18:14]

United unnu Samfélagsskjöldin líka í fyrra og þá stóð það ekki á sér að eftir fylgdu sigur í deild og meistaradeild.

Og ef þú ætlar leita að hliðstæðu leiksins um Samfélagsskjöldin í íslenskum fótbolta þá er það leikur meistara meistaranna á hverju vori hér á landi. 

[Maggi (IP-tala skráð) 10.8.2008 kl. 18:56]

Þeir geta líka unnið Super Cup og heimsmeistaratitil félagsliða.

[Pinky and the Brain, 10.8.2008 kl. 19:00]

Það gerist, að Reykjavíkurmeistarar vinni deildina, og sama gildir um handhafa samfélagsskjaldarins. Oftar en ekki er það hins vegar svo, að þetta er fyrirboði á vonbrigði í deildinni. MU var með sanni heppið að Portsmouth skyldi kyrfilega klúðra vítaspyrnukeppninni. Ekki hafði MU unnið fyrir sigri í leiknum sjálfum. Það var heppni, að Tevez fékk ekki rautt fyrir hálstak á Hreiðarssyni. Kom þar enn eitt dæmið um ótrúlegan sleikjuhátt dómara við MU, sem oft hefur skilað stigum og dollum á Old Trafford. Mu er háaldrað lið, nema ef vera skyldi fyrir þessa, sem ganga um í jakkafötum með bindi þessa dagana. Giggs á áreiðanlega orðið rétt á heimahjúkrun og afslátt í sund og strætó. Scholes er ekkert unglamb. Ronaldo er kominn með hugann á suðlægar slóðir þegar og ef hann kemur úr meiðslum. Mínir menn á Emirates eiga hins vegar allir mikið inni. Það verður gaman hjá okkur skyttunum, þegar liðin mætast í haust.

[Pétur Orri Gíslason, 10.8.2008 kl. 19:13]

Þér ferst að tala Pinky. United var betra liðið í venjulegum leiktíma og áttu um 10 tilraunir á markið á meðan Pompey áttu eina. United liðið virkilega vængbrotið en átti samt leikinn og var einungis David James að þakka að þeir fengu tækifæri á að stela þessu í vítaspyrnukeppni en afrógengið þeirra stóð sig eins og hetjur.

Já já það var heppni með Tevez en þegar maður er búinn að reyna að skemma alla barna framleiðslu með að ráðast á slátrið og hvað þá svo halda þeim þannig að þeir ná ekki til boltans, þá á sá maður ekki mikið gott skilið. Hermann í rauninni stálheppinn að ekki var dæmt á hann.

Já ég segi frekar já takk við "háaldra" liði sem vinnur titla og fyllir hjarta mitt af stolti og ánægju heldur en lið af kjúklingum sem eru í keppni um þriðja sætið. 

Hversu mikið eiga þínir menn inni? Búnir að missa Flamini, Hleb, Silva og núna Diaby í meiðsli í mánuð. Miðjupar Arsenal verður Fabregas sem er auðvitað frábær leikmaður og svo auðvitað Denilson sem er enn blautur á bak við eyrun. 

[Pinky and the Brain, 10.8.2008 kl. 19:38]

Í seinni tíð hef ég fengið nokkrar mætur á Alex Ferguson. Hann hefur staðið sig vel, þó að ég eigi nú enn eftir að sjá hann byggja upp lið án þess að eyða u.þ.b. herframlögum bandaríska ríkisins í leikmannakaup. Það er ólíkt mínum manni, Meistara Wenger, sem hefur byggt upp lið Arsenal með því að kaupa ódýrt unga menn, sem aðrir hafa ekki séð hæfileikana hjá. Má þar nefna Henry, Anelka, Pires, Flamini, Adebayor og fleiri. Meistari Wenger býr til stjörnur en Ferguson kaupir stjörnur.

 Það geta allir verið sammála um að Arsenal hefði að óbreyttu rúllað upp deildinni í fyrra. Slátrarinn frá Birmingham setti strik í reikninginn en Eduardo verður nú kominn á fullt fyrir áramót og fögnum við endurkomu hans. Að sjálfsögðu sjáum við eftir Flamini, sem heldur betur var farinn að blómstra. Hleb hefði aldrei skilað Arsenal miklu og verður að setjast í þann fámenna flokk, sem flokkast undir mistök Meistara Wengers. Engin eftirsjá af honum. Ólíkt Mu lætur Arsenal ekki draga sig út í vitleysis launasamninga við leikmenn og því erum við ávallt tilbúnir að láta þá, sem telja sig stærri en liðið, einfaldlega flakka. Þannig verður það áfram. Mu og Chelsea geta haldið áfram að sprengja upp launaskalann. Það verður alltaf hlutskipti þeirra, sem reyna að kaupa gott lið í stað þess að byggja það upp. Meistari Wenger tekur ekki þátt í slíku.

Eigum við ekki að tala saman eftir að Arsenal og mu hafa mæst í deildinni í vetur. Mikið hlakka ég til.

[Pétur Orri Gíslason, 10.8.2008 kl. 19:50]

Ferguson og Wenger eiga eftirfarandi sameiginlegt:

Fengu töluvert fé til leikmanna kaupa fyrst þegar þeir komu til félagsins. Eftir nokkura ára veru fóru báðir í gegnum tímabil sem Wenger er reyndar enn á þar sem stækka var verið aðstöðu til áhorfenda og þurftu því að heldur betur að herða á ólinni. United eru svo komnir út úr því og komnir aftur í þá stöðu að geta keypt leikmenn. United eyða aldrei um efni fram hvorki í leikmannakaup né laun. Þeir einfaldlega fá alveg óheyrilegar upphæðir í kassann. 43% af innkomu United fer í laun þrátt fyrir að vera með feitan launapakka á meðan Chelsea eru með meira en 100% af sinni innkomu í laun.  Wenger er hins vegar enn að spila við það umhverfi að þeir voru að byggja nýjan völl og þurfa að fara gætilega.

En jú jú við getum alveg spjallað frekar saman eftir þann leik eða einfaldlega eftir tímabilið ef því er að skipta. 

[Pinky and the Brain, 10.8.2008 kl. 20:10]

Ég reikna með að stærstu mistök Fergusons heiti Juan Sebastian Verón, sem var keyptur á tæpar 30 milljónir punda og gat ekkert hjá Mu. Launin hans voru víst líka þannig að hann þurfti aldrei að hafa áhyggjur af mánaðarmótum. Sumir segja að þetta séu verri kaup en þegar West Ham losaði Arsenal við Ljungberg, sem hafði raunar skilað góðu starfi hjá Meistara Wenger.

Að þessu sögðu, þá held ég að við tökum þetta ekki lengra í bili. Það verður gaman að tala betur saman eftir leiki Mu og Arsenal í vetur eða bara eftir tímabilið. Ég hlakka mikið til. Hvernig sem fer;-) þannig er fótboltinn.

[Pétur Orri Gíslason, 10.8.2008 kl. 20:19]

Já það getur öllum orðið á í messunni og þá er Ferguson og Manchester United ekkert þar undan skildir. En ef við setjum þetta í hlutfallslegt samhengi þá keypti nú Wenger Francis Jeffers frá Everton á um 10 milljónir sem var heldur betur æðislegur hjá ykkur eða þannig. United náðu líka að "kötta" tapið með Veron og seldu hann til Chelsea á 15 milljónir punda og keyptu svo Ronaldo á 12.25 milljónir punda. Alveg ágætur bisness þegar upp var staðið.